ازاي تبقي دوت نت ديفلوبر شاطر ومطلوب في سوق العمل

في البداية عشان تبقي دوت نت ديفلوبر لازم تبقي محدد هدفك من تعلم الدوت نت يعني عايز تعمل ايه بيها ؟ هل عايز تتعلمها علشان تعمل ويب ابليكيشن ولا تتعلمها عشان تعمل موبايل ولا ديسكتوب .. كل حاجه منهم ليها طريق تمشيه ولكن كلهم مجتمعين معتمدين علي لغة من اقوي لغات البرمجة في العالم حتي وقتنا هذا وهي لغة السي شارب

 

طيب عشان تسهلها علي نفسك في اساسيات لازم هتدرسها علشان تتخصص بعدها في واحده من التخصصات الي ذكرتها فوق والاساسيات دي بالترتيب هي

1- تدرس لغة السي شارب كأساسيات وتفهمها كويس

2- تدرس الــ OOP بالعربي اسمها البرمجة كائنية التوجه

3 – تدرس قواعد بيانات وهنا غالبا هندرس SQL Server من مايكروسوفت

4 – هتدرس حاجه اسمها LinQ ودي بتخليك تتعامل مع الداتابيز من خلال كود السي شارب

5 – هتدرس حاجة اسمها Entity Framework ودي الطريقة الاسرع والاأمن والاحدث في التعامل مع الداتابيز

 

كده نقدر نقول انت معاك الاساسيات هنيجي بقي نشوف كل تخصص من اللي فوق ايه حكايته

 

اولا مجال الديسكتوب – Desktop

وده مطلوب بس مش كتير نظرا لان العالم كله متوجه نحو الويب والموبايل ولكن يبقي ليه سوق .. المهم عشان تخصص في المجال ده ف انت محتاج بالاضافة للاساسيات انك تدرس WPF علشان تقدر تعمل تطبيقات محترمه وشكلها ابن ناس وكمان تتعلم التقارير وليكن علي سبيل المثال Crystal Reports

 

ثانيا مجال الويب – Web

ودا المجال الاشهر والاكثر طلبا في السوق وده عشان تدخله بعد ما تتقن الاساسيات ف انت محتاج تذاكر الاتي

1 – تذاكر تقنية ASP.NET

2- تفهم اسلوب الــ MVC وطبعا بالتبعية هتذاكر ASP.NET MVC

3- هتذاكر اساسيات الويب التلاتة (HTML – CSS – JavaScript )

4- هتفهم فريورك يسهلك شغل الويب والفرونت الي حد كبير وليكن Bootstrap

5- تذاكر Web API

6 – تطبق كل اللي فات ده مع الدوت نت كور بنسبة كبيرة هيبقي الامر بسيط لو اتقنت اللي فوق ده كله

 

ثالثا مجال الموبايل – Mobile

وهنا السي شارب مكملة معانا من خلال تقنية الــ Xamarin ودي موجوده من ضمن الادوات الي بتقدمهالنا مايكروسوفت ودي اداة بتساعدك تكتب الكود مرة واحده بالسي شارب وتعمل بيه برنامج يشتغل علي الاندرويد والايفون في نفس الوقت

 

كده انت عرفت المطلوب منك عشان تشتغل دوت نت ديفلوبر وكل ما ذكرته في الموضوع ده ما هو الا اساسيات وضروريات لسه في حاجات كتير ناقصاك ولكن طبق اللي في الموضوع ده هتبقي علي اول الطريق وفي المواضيع الجاية هانزودك بالكورسات اللازمة سواء من عرب ست او من بره عرب ست لتأهيلك بقوة لتصبح مطور دوت نت شاطر ومطلوب في سوق العمل.

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *